لأى حد عايز ينسى حبيبه السابق...خش و إن شاء الله هتنساها أو هتنسيه

بسم الله الرحمن الرحيم


على فكرة دا أول موضوع أكتبه فى حياتى فإن شاء الله هيعجبكوا و أبقوا قولولى أيه رأيكم و أنا كنت بدخل منتديات كتير و أقعد أقرى و أشوف الناس اللى عرضة مشاكلهم بأنهم عايزين ينسوا اللى بيحبوها و دا كتير لأ و فيه ناس بتقعد بالسنين مش عارفة تنسى رغم أن الأمر محتاج أسبوعين بس أو تلاتة بالكتير أوى...فأنا عندى الحل و إن شاء الله ربنا هيخليكوا تنسوا اى حد عايزينه على إيدى بس معلش هطول عليكوا لأن الموضوع كبير فلازم تقروه للأخر وأنا أوعدكوا انكوا هتنسوا أولآ أنا أسمى كريم و انا لسة جديد فى المنتدى و دى اول مشاركة ليا...و فيه ناس هترد و تقول الحلول دى كويسة بس الللا إيده فى المسة غير اللى فى النار....أقولكوا أن انا اتعرضت للحكاية دى و حبيت واحدة سنتين و كنت شايفها أجمل واحدة فى الدنيا رغم انها مش أجمل واحدة خالص و كان صوتها عندى أجمل صوت رغم أن صوتها مكنش أجمل صوت خالص و فيه أجمل منها بكتير بس مكنتش معترف بذلك...و كنت شايف أنها مفيهاش غلطة واحدة بس بعد مطلعت حبها من قلبى أكتشف حاجات كتيرة جدآ وحشة مكنتش شايفها...و ضحيت بحاجات كتير جدآ و كنت بعمل عشانها حاجات كتيرة و من وراها بس المهم انى كنت أشوفها مبسوطة و مكنش معايا موبايل اشتريت مخصوص عشانها...و مكنتش بقولها كلام حب بس كنت بعوضها عن كلام الحب بالحنان...و مكنتش متخيل حياتى من غيرها و دايمآ بفكر فيها و هى مراتى و بنتجوز و نخلف و نجوز ولادنا...قعدنا سنتين على كدة و بعدها حصل و سبنا بعض....قعدت أول شهر متدمر...بس بعدها فقت و قلت لنفسى ان اية خلاص و لازم تنساها بأى طريقة لأن مستقبلك بيتدمر فلازم تنساها....و نستها بعد أسبوعين بالضبط....و أكيد اللى بتحبها شايفها أحسن واحدة و مش عارف تنساها لأنك مش متخيل واحدة غيرها تحل مكانها و كل متروح مكان تتخيل أنها لو معاك فى نفس المكان و بتتخيل وانتوا متجوزين و بتهزروا و بتلعبوا و حتى و انتوا بتتطبخوا...و لما تفكر أنك تسيبلها البلد و تسافر تشتغل برا تقعد تتخيل أنها سافرت معاك و قادة جمبك فى الطيارة و مأنجشين بعض و قاعدين فى هوتيل و بتتفسحوا برة...فخلاص جبت أخرك مش عارف تفكر ف أيه عشان متفكرش فيها...أحب أقولك أن كل دا عادى خااااااااااالص و أن اى حد بيحب حد تانى بجد بيفكر فى كل دا...و أحكيلكوا قصة واحد أعرفه كان فيه بنت مش عجباه خالص بالمرة و كان بيتأرف منها اوى...لأنها شكلها مش حلو و سمرة و مبهدلة و مليانة..قعد معاها تلات مرات و فى كل مرة ساعتين تلاتة فحبها أوى و حبته و بعدها بشهرين بقى بيعشقها جدآآآآآآآآآ و وصل لقمة الحب....رحت قلتله ايه يابنى مش دى البنت اللى مكنتش عجباك و مليانة و سمرة و و و و....قالى السمار نص الجمال و أنا أصلآ بيعجبنى البنات المليانة و والله شايفها أجمل واحدة و مش عارف اشوف غيرها....المهم بعدها ب 5 شهور راح سابوا بعض عشان اهلها....نفسه ينساها مش عارف و لحد دلوقتى مش عارف ينساها رغم انه كان اول ميشوفها كان بيبقى عايز يتقيأ...مش بيقولك مراية الحب عامية؟؟؟ أو الحب أعمى و لأن اللى بيحب بيكون رافض انه يتقبل أى حاجة وحشة فاللى بيحبه....طب دى حاجة...تانى حاجة أن فيه ناس بتتغير للأوحش بعد الجواز... أزاى ؟؟؟؟ قبل الجواز الإنسان بيقعد يجمل فى نفسه فاللى بتحبه بتحس أنه أحلى واحد فى الدنيا و بتكون متأكدة مليار فالمية أن دا اللى هتكون سعيدة معاه و الكلام دا بالنسبة للولاد والبنات...بس لما ييجوا يتجوزوا الوشوش الحقيقية تبتدى تبان...عشان كدة أغبلية اللى بيتجوزوا تلاقى الزوج بيقول معقولة هى دى اللى حبتها قبل لجواز ؟؟!! أستحالة و هى تقول معقولة هو دا اللى حبيته قبل منتجوز..!!..عشان كدة فيه جوازات كتيرة اوى بيكونوا واخدين بعض عن حب و بيفشلوا و دى بنسبة كبيرة جدآآآآ و عملوها أحصائية طلعت بنسبة 70 فالمية من الجواز اللى بييجى بعد قصص حب بتكون جوازة فاشلة...و كان فيه بنت غنية أوى حبت واحد بسيط برضه شفته أحسن واحد و وقفت قصاد اهلها عشانه و قالت انها مستعدة تعيش معاه على مرتبة للنوم و قعدة عرب عشان الضيوف بس....أتجوزوا و فى نفس الشهر مقدرتش تستحمل فأتطلقوا..و الحكايات من دى كتييييييير بس مش عايز أطول عليكوا..
أنا هبتدى الموضوع بس أنا بوجه موضوعى للى عايز ينسى بجد....و هديكوا مثال صغير...تلاتة مدمنين دخلوا مصحة لما خرجوا منها واحد مات وواحد رجعلها تانى و واحد نجح فى حياته وفى دنيته....الأول مات لأنه طنش القواعد اللى كانوا قالولوا عليها فى المصحة....التانى رجعلها لأنه منفذش القواعد دى بطريقة صارمة...التالت نجح فى حياته وبطل الأدمان لأه مشى على القواعد دى بطريقة صارمة ومسمحش للشيطان أنه يدخل مخه تانى.
فعايزكوا كلكوا وبجد تنوا أنكوا هتنفذوا كل اللى هقولكوا عليه بطريقة صارمة وبجد والله إن شاء الله هتنسوا...لأن الطرق دى خلتنى أنا انسى وخلت ناس كتيرة جدآ ينسوا الحب اللى ضيعهم و كانوا ضايعين بجد.
طب أيه الحاجات اللى بتخلى الواحد مش عارف ينسى ؟؟؟
أولآ: أنه بيكون عنده أحتمال ولو واحد فالمية أنه ممكن يرجعلها أو أنه يقعد كل شوية يبص على الموبايل و يشوفها أتصلت بيه ولا لأ و أول مالموبايل يرن يجرى عليه و هو بيتمنى أنها تكون اللى بتتصل و يقعد يسأل نفسه طب هى هتتصل عشان تحاول ترجعلى ولا لأ....تفتكروا كدة ممكن تنسوا ولو حتى بعد خمس سنين؟؟؟
ثانيآ: أنك تفضل شايفها أجمل واحدة و انك تفضل مش شايف عيوبها خالص ...و أنك تكون لسة فاكر انها أحسن مخلوقة على الأرض و دا هيتغير لما تبتدى تمشى فى طريق النسيان الصح.
ثالثآ: المقارنة بينها و بين أى بنات تانيين لأنك مادام بتحبها أكيد المقارنة هتكون فى صالحها.
طب تعمل ايه عشان تنسى اللى بتحبها و تعملى ايه عشان تنسى اللى بتحبيه ؟؟؟؟ سواء سبته بعض عشان الخيانة و عشان اهلها رافضين أو عشان اتخطبت غصب عنها أو أو أو .......
أولآ: أنوى بجد أنك هتنساها و شيل من مخك خالص أنك ممكن ترجعلها فى يوم من الأيام...غير رقم تليفونك و أعمل بلوك على إيميل و الفيس بوك و كل حاجة بحيث أنها حتى لو حبت ترجع متعرفش توصلك...لو معملتش كدة يبقى أنت أصلآ مش عايز تبعد و تنساها يبقى هتفشل مية فى المية مادام من جواك مش عايز.
ثانيآ: طبعآ حكاية قربك من ربنا و الدعاء دا شئ مفروغ منه حتى لو مفيش حب أصلآ....بس قول يارب أنا سبتها عشانك و تأكد مية فالمية أن ربنا هيرزقك بواحدة احسن منها...و بالمناسبة أن فيه شيخين من اللى بيحظونى قرآن حلفولى بالله أنك لو سبت اللى بتحبها عشان ربنا والله ربنا هيرزقك بأفضل منها و تكون مراتك...و ساعتها لو جبتلك مراتك و جبتلك حبيبتك اللى نفسك تنساها هتختار مراتك.....حاجة تانية فى النقطة لازم تعملوها...أنكم تبعدوا عن أى مكان أو اى حاجة تفكركوا بالحبيب...و أهم حاجة فى الموضوع ان لما بتقطع علاقتك معاها برضه بتكون لسة مش عايزها تحب تانى أو كدة لأنك بتكون لسة حاسس أنها ملكك... فلازم تكونوا مقتنعين مية فالمية أن اللى كنت بتحبها دى خلاص مالهاش اى علاقة بييييك خالص ...تحب تانى متحبش انت مالكش دعوة زيها زى أى بنت ماشية فى الشارع ولاااااا تهمك...
ثالثآ: معروف أن المشاعر بتولد الفعل...يعنى لما بتكون حزين بتتصرف تصرفات واحد حزين و كئيب وكذلك لما تكون سعيد...يعنى العاطفة او المشاعر الأول وبعد كدة بييجى الفعل على حسب المشاعر...طب كويس أوى كدة....ثبت علميآ بقى أن برضه الفعل ممكن يولد المشاعر يعنى أيه ؟؟؟ يعنى لو أتصرفت تصرفات واحد سعيد ومبسوط و خرجت وجيت وبقيت مرح العاطفة والمشاعر هتتغير للسعادة...أما لو أتصرفت تصرفات واحد كئيب و حزين هتلاقى نفسك كئيب و منطوى....فحاولوا ياجماعة على اد متقدروا انكوا تتصرفوا تصرفات واحد مبسوط و سعيد ومرح...أَضحكوا و أخرجوا مع صحابكوا...والله العظيم دا هيفرق معاكوا جدآ والخروجات مع الصحاب هتفرق...روحوا أماكن جديدة وحاولوا تسافروا و كل يوم هاتوا الجرنال وشوفوا أخبار الدنيا أول بأول.
رابعآ: مخ الإنسان بيرمج نفسه على اللى أنت بتقوله على نفسك يعنى أيه ؟؟؟؟ لو انت قعدت تقول دأناا عمرى مهعرف انساها و مش هلاقى حد زيها هتحبط و مش هتنساها....لا أقعد قول لنفسك أنك قوى و أنك هتقدر تتغلب على الحب دا و أنك هتقوم و هتكون أحسن من الأول...و أن مفيش حد هيأثر على حياتك بالسالب أبدآ...أنت ملك نفسك و بتاع نفسك و هتمشى حياتك زى مأنت عايز.
خامسآ: صحابك أخرج معاهم على أد متقدر و روح دريم بارك و سينما و سافروا كتير و كتفوتش أى رحلة فى الجامعة
سادسآ: أنا لما كنت بحاول أنسى بدأت أساعد ناس كتير و أحاول أسعدهم لقيت أن إسعاد الناس دى طريقة سحرية للنسيان...أزاى؟؟؟؟ لما تاخد نص مصروفك و تنزل بنفسك تلف على الغلابة فى بيوتهم و تديهم فلوس و تسعدهم هتحس أنك عالى و ثقتك فى نفسك هتعلى و هتحس أنها متستهلكش أصلآ...و كمان الصدقات بترفع البلاء و اللى انت فيه دا بلاء....فحاول على اد متقدر تسعد الناس بأى طريقة.
سابعآ: بلااااااااااش الأغانى والأفلام الرومانسية والحزينة دى أرجوكوا....حاولوا تبطلوها على الأقل لحد متنسوا...الأفلام والأغانى دى بتخليك تفتكر اللى بتحبها وبتزود مشاعر الحب جدآ جدآ جدآ....فيه أغانى حلوة بتساعد الواحد على أنه يقوى و يفوء...و بدل الأفلام الرومانسية حاول تشوف أفلام كوميدى كتير عشان تضحك و نفرفش أو أتفرج على أكشن عشان تركز و تخلى الفيلم يااخدك للعالم بتاعه.
ثامنآ: برضه ثبت علميآ أن أى حد فى الدنيا فيه هواية معينة تلاقيه حريف فيها جدآ...و أن الهواية دى و هو بيمارسها هتلاقيه ناسى الدنيا واللى فيها و تلاقيه مركز فيها جدآ و فى قمة سعادته وهو بيمارسها...الهواية دى ممكن تكون طبخ أو جرافيك أو رياضة معينة أو أو أو....بس للأسف 20 فالمية بس من الناس هم اللى بيعرفوا يكتشفوا موهبتهم الحقيقية اللى تقدر تنسيهم الدنيا واللى فيها...يعنى أنت فيه جواك هواية حاول تكتشفها و تعرفها وتمارسها علطول لأن دى هتساعدك كتير جدآ.
تاسعآ: قبل مقول النقطة عايز أحكيلكوا حاجة....أعرف ناس كتير جدآ جدآ كانوا نفسهم فى طب وهندسة وصيدلة وإعلام و و و..وكانوا والله لو شفتهم و هم بيذاكروا هتقول دول مية فالمية هيجيبوا 99% فالثانوية العامة..ربنا خلاهم يدخلوا كليات تانية زعلوا جدآ وانهاروا وحسوا ان مستقبلهم أسود وأنهم ضاعوا خلاص...الناس دى كلهم بقوا من أنجح الناس فى المجالات بتاعتهم و ربنا فتحها عليهم و بقوا ماشاءالله أغنيا جدآ ماشاءالله...يعنى واحد بقى دكتور فى الجامعة وواحد كان نفسوا فى طب دخل تجارة بقى مدير بنك....بس لو بصيت من ناحية تانية أنهم لو كانوا دخلوا اللى هم نفسهم فيه مكنوش نجحوا أو مكنوش بقوا فى المكانة اللى هم فيها دلوقتى وكانوا هيبقوا ناس غلابة وعلى اد حالهم....واللى كان نفسوا يخش طب دا كان ممكن ياخدها فى خمستاشر سنة و يشتغل و يكون نفسه فى خمس سنين يعنى كله كله فى عشرين سنة وهى نفس المدة اللى عرف يوصل فيها لمدير بنك..يبقى أنهى أحسن له ؟؟؟؟ طب أنا بقول الكلام دا ليه ؟؟؟ بقوله عشان أى حد سابتوا حبيبته يبقى أكيد مليار فى المية أنها مش هى اللى كانت هتسعدوا وأن فيه واحدة تانية هو ميعرفهاش هيتجوزها وهتسعده و هيعرف أد ايه كان غلطان لما أفتكر أن الأولى دى هى اللى هتسعده بجد....لأن ربنا عارف مين اللى يناسبك و هيسعدك ومين اللى لأ.
أخر كلمة عايز أقولها أن دى حياتك محدش هيمشيها غيرك و متسمحش لأى حد فى الدنيا دى أنه يغيرلك حياتك...و هنعيش مهما هنعيش 60 أو 70 أو 80 سنة هى دنيا واحدة و بعدها إن شاء الله جنة بلا نهاية و خلود للأبد...و خليك أقوى من أى حد و أقوى من الحب و أقوى واحد فى الكون دا و أنسى أى حاجة ممكن تأثر فيك....
أنا أتبعت الخطوات التسعة دى و بجد عرفت انسى فى أسبوعين ..... ياريت أى حد عايز ينسى حبه القديم يتبع الخطوات دى وبجد و إن شاء الله هينسى..

kimo120